Unha vida viquinga

A exposición internacional “Unha vida viquinga” é un dos eventos máis destacados da programación da Cidade da Cultura para 2024. Esta mostra reúne ao redor de 120 pezas, cun centenar provenientes de prestixiosos museos de historia e arqueoloxía de Europa, incluíndo catro museos nacionais e unha biblioteca nacional. A exposición está comisariada por Irene García Losquiño, doutora en Estudos Escandinavos pola Universidade de Aberdeen e experta na Idade Viquinga.

A exposición ofrece unha mirada profunda á cultura nórdica durante a Idade Viquinga (segunda metade do século VIII á segunda metade do século XI) a través dunha variada colección de obxectos históricos e arqueolóxicos. Máis aló dos estereotipos populares, a mostra destaca aspectos como a participación das mulleres en campañas guerreiras e exploracións, e a interacción dos viquingos con outros pobos e terras, xa sexa mediante conquistas, asentamentos ou relacións comerciais.

O percorrido da exposición estrutúrase ao redor das etapas de vida dunha persoa viquinga: desde o seu nacemento, pasando pola súa infancia, mocidade, madurez e ata despois da súa morte. Este enfoque innovador permite coñecer a civilización viquinga desde unha perspectiva humana e diversa, combinando eventos de distintas décadas e séculos dentro do marco temporal de “unha vida”.

Horario

De martes a domingo de 10 a 20 h